本文重點
近排大陸央企嘅高層人工成為熱門話題，好似中海油（00883）董事長傅成玉去年賺1,200萬元人民幣年薪備受批評，要公司澄清有關人工只係「名義收入」，話會全數捐番畀母公司先至平息風波。中石油（00857）尋日出嘅○八年年報就顯示，董事長蔣潔敏舊年人工係零，唔通佢又係將份糧捐畀母公司？
中石油發言人同絲絲講，由於蔣潔敏喺母公司有職銜，所以佢份糧由母公司負責，唔會顯示喺上市公司年報入面。據絲絲理解，唔少央企老總嘅人工都會有類似安排，係咪同近期鬧得熱烘烘嘅高管薪酬改革有關就不得而知。
南航高層已減薪
除咗油公司，南方航空（01055）高層薪酬亦惹人關注，事關南航舊年勁蝕48億元人民幣，但高層年薪就加咗近五成。南航董事會秘書謝兵解釋，話公司喺○七年表現好好，薪酬上漲係反映○七年嘅獎勵喎！
隨着業績下滑，南航喺去年下半年開始，基層以上嘅管理級人員月薪減一成，投資者喺○九年嘅年報就會睇到高層薪酬下降㗎喇！
余絲韻