本文重點
正是道不同不相為謀，領匯（00823）大股東英國對沖基金TCI嘅董事兼亞洲區代表何志安，據悉因為唔同意基金創辦人嘅投資策略，所以自行離職，仲會自己搞一檔新基金，專注亞洲區股票咁話。
現年32歲嘅何志安之所以為港人熟悉，其實都要多得領匯，中文名直譯為「兒童基金」嘅TCI，喺○五年底、○六年初密密購入領匯，持股量最多嗰時達到18%，成為領匯大股東。咁大筆投資自然要搵人睇實，所以喺○六年七月指派何志安進入領匯，成為非執行董事。
剩番創辦人自己玩？
如果何志安真係好似傳聞咁離任，加埋早前離開嘅TCI共同創辦人Snehal Amin以及Patrick Degorce，絲絲數吓手指，現時TCI合夥人就剩番創辦人Christopher Hohn，睇實旗下95億美元嘅對沖基金。舊年個基金成績認真差，全年下跌43%，與○三至○七年嘅年增長42%，真係差天共地。
何志安劈炮，咁TCI會唔會派其他人入領匯董事局呢？領匯發言人無直接評論，淨係話所有董事委任或離任事宜，都會按公司嘅企業管治同政策作出公布喎！
余絲韻