本文重點
金融海嘯後樓價急跌，期間嚇怕唔少投資者，要急急腳將揸住嘅新盤二手單位「高買低賣」，中原劉雪芳就同Vincent講，美資基金TPG近排將手頭上幾十個長沙灣星匯居嘅單位減價，令蝕讓幅度由原來約18%擴大到20%至30%。
佢又話，呢間基金公司之前已連環沽出4個星匯居二手單位，蝕幅全部超過20%，其中1座高層D室，賣出價只有230.7萬元，蝕幅達20.9%。
Vincent又八到，有部分唔願損手離場嘅星匯居業主選擇將單位放租，不過由於該盤租金同樣偏低，令租金回報率認真麻麻，入伙至今錄到約26宗租務成交，全部回報率均低於3厘，其中1座高層D室，面積521方呎，以每月7,500元租出，租金回報率只係得2.3厘，仲差過以回報率低見稱嘅豪宅。
新地成都盤倣港豪裝
另外，已進軍內地房地產市場多年嘅新地（00016），不斷將該集團在本港豪宅嘅設計引入內地項目，其中計劃喺今年推售嘅成都悅城豪宅項目，會引入豪宅設計，包括頂層單位設有天際私家泳池或屋頂按摩Spa池，而中層單位就以空中複式戶連特大露台花園等設計，項目嘅住宅總樓面約600萬方呎，由25幢26至46層高住宅組成，整體單位量超過4,000個，首期工程會提供約1,200伙，預計年中平頂。