本文重點
家陣金融海嘯第二波殺緊埋嚟，各行各業都講緊減成本甚至係裁員，連中國市值最大嘅公司──中石油集團亦唔例外，佢哋最近出咗個內部通告，講明面對愈嚟愈嚴峻嘅經濟形勢，集團上上下下都要「厲行節約，制止奢侈浪費行為」，絲絲心諗佢哋國企有義氣，講到明唔會裁員，惟有透過其他方式減吓成本希望吊住條命先再講。
車同會都限住開
通告內容要求減少燈油火蠟、慶典、文件通訊、招待、出差等費用，最重要嘅係唔准再買新嘅豪華汽車、唔准再開咁多會，或者起新嘅辦公大樓同賓館同埋贈送任何禮品等等，以上種種節約行為期限至二○一○年。
其實內地一家國企就好似一個小型社會，裏面咩都有，而佢哋時不時又可以成日以開會為名，訂定啲度假勝地賓館酒店咁，然後啲與會者仲可以帶埋屋企人去添，仲有啲豪華汽車，話就話係公司車，但成日都會畀某啲人長期借咗去用等，所以絲絲覺得中石油集團嘅減省開支通告係好合理㗎。