本文重點
自從上海發展為國際金融中心嘅宿願獲得中央「祝福」之後，絲絲嘅一班老友就好擔心香港嘅前途，怕香港稍有閃失就會變成阿二。最近聽聞曾經蟬聯台灣首富幾十年嘅蔡家，旗艦企業國泰人壽喺香港設立據點十年後，最後竟然決定閂門走人，只保留咗公司註冊。
市場太細 港有隱憂
絲絲覺大事不妙，向國泰老友求證。果然沒錯！老友話，佢哋喺內地開合資保險公司嘅進展唔錯，分公司開完一間又一間，加埋香港市場太細，所以索性收咗佢，香港首席代表就被派到廣東分公司任職。
曾經蟬聯台灣首富幾十年嘅蔡家，自從老人家蔡萬霖走咗之後，就由長子蔡宏圖當家。大家都好奇，點解以金融、地產起家嘅蔡家，唔嚟香江一展身手？憑着蔡家嘅財力，渡海來港淘金可謂如魚得水㗎！
不過，後來堂兄弟蔡明忠出咗手先，收購富邦香港（00636）前身港基銀行，而蔡宏圖旗下嘅銀行亦設立咗香港分行，但係最具代表性嘅國泰人壽，就選擇低調退出香港。件事透露咗香港嘅隱憂，就係無實體經濟支持下，點同上海競爭呢？