雖然上星期五平晒倉，但隻鎊尋日低位都已經係1.4847，原本我都打算等開市揸番隻鎊，所以都特登叫Jenny，如果佢早起身嘅話，就畀個morning call我。尋日朝七點半鐘度，真係收到Jenny嘅電話，佢話隻鎊已經升近1.49。
原本諗住等佢回些少，例如試番1.4850先至入市揸貨，但等極都唔見，最多只係見過個沽價係1.4868，但係你都唔好話高，因為唔使一陣已經升咗上去八十幾九十，之後仲破埋1.49，一破就上到1.49三十幾。由於上星期都試過，朝早九點幾鐘挾上去，但十點幾鐘已經跌番成百點，所以我都忍住唔追。
下晝兩點幾鐘穿過1.49，但好快上番去，後來見佢企穩1.49樓上，我認為隻鎊會喺1.49整固，之後再挾穿1.50，所以都決定入市，喺1.4922揸咗一手。不過其實都係試試吓，始終呢輪累積都升咗唔少，就算調整番去1.45都係正常。啲過氣高息貨幣咁強，同隻YEN跌穿埋101有好大關係，我諗緊好唔好揸歐元，因為相對隻鎊未升夠，而且歐鎊交叉企喺0.90呢個大位，短期追落後嘅話，隨時見1.38。
蘇小妹