大笨象（00005）供股反應理想，只有約3%的供股權未有完成供股，其供股股份將於周四在本地魚缸買賣，但昨日率先在米字旗國掛牌，股價在當地魚缸反覆做好，古勝執筆時，報約463.5便士，折合約53.5港元。
挾淡行動隨時繼續
有斷估專家認為，大笨象供股股份在周四掛牌時將遇沽壓，但在下卻相信大笨象的捧場客較為長情，買入供股權供股後圖短暫利益的投機者只佔小部分，唔會因供股股份掛牌令大笨象仆直。
大笨象已連續第五個交易日反彈，恒指亦受其帶動升逾千點，若然好友要咬住淡友唔放，下一浪應搵祖國移動（00941）擔大旗，昨日祖移股價升逾70元水平，報收70.2元升2.4%，走勢開始見突破。
上周四本地魚缸單日升逾千點，唔少散戶資金流入買熊證做淡，更驅使大戶狂挾淡倉，若果淡友唔肯全面投降，古勝相信好友會愈挾愈狠，十二月份高位15,780點或能升破，並挑戰16,300水平。屋仔市場小陽春，交投活躍咗唔少，亦造就本地地主股價從低位大幅反彈，唔覺唔覺超人旗艦（00001）同三兄弟檔口（00016）從低位反彈超過兩成。
本周末係復活節長假，唔少地主已磨拳擦掌準備在長假賣樓，只要賣到似樣成績，地主仲有權再挾高，本地魚缸要挑戰下一高位唔困難。既然大戶有心挾淡倉，散戶無謂對着幹，即使看官唔相信花旗或本地魚缸已見底，在下亦唔相信牛市重臨在即，但短線走勢確係走高，先避其鋒再吼機會出擊，唔值得死牛一面頸做淡。
國策支持不愁生意
昨日農業股又再落鑊，相信啱啱開始炒呢一瓣，古勝建議睇番中化化肥（00297），近日見其成交開始增加，料新一輪升浪即將展開。中化肥是祖國最大的化肥生產和經銷企業之一，去年全年實現銷售收入453.93億元人仔，同比增長59.94%，淨利潤19.13億元人仔，每股盈利0.274元人仔折合0.31港元，同比增長156%，派息0.0464港元。若撇除來自公司持有的可轉換票據1.63億元的「衍生金融工具公允價值變動」收益，公司淨利潤17.49億元，實際增長幅度仍不到30%。
雖然呢份成績表，反映中化肥的產業結構唔多正常，但祖國政府大力資助農業發展，料中化肥本年度營業額可獲一定保證。雖然祖國化肥價格於去年第三季大幅回落，令中化肥毛利率減少至7.49%，但公司管理層表示，化肥價格已於今年首兩個月回升，毛利率應可回穩。以其現價計算，中化肥○九預測巿盈率不足10倍，較過往高達30倍的歷史巿盈率，現價估值已偏低。
古勝