中國證監會尋日就發布「首次公開發行股票並在創業板上市管理暫行辦法」，是次發布標誌着經過了十年籌備的創業板，終於正式啟航！故小尾相信，日後內地證券股應有一番炒作。
另方面，由於內地將公布三月份消費物價指數，而人行行長周小川，其實亦多次暗指利率尚有下調空間，近期更指「利率政策的制訂將依據即將公布的內地首季經濟數據」，此番說話實在令人產生遐想，減息將不遠矣，因此內房股尋日亦見異動，大家可以留意。
雖然美股大跌，但港股一於好少理，最終升119點，收報13,576點，大部分股份都反彈，當中與太陽能相關概念股繼續受捧，原因早前已講過，就係受惠內地財政部、住房和城鄉建設部一齊推出的「太陽能屋頂計劃」，至於細價股，更加係尋日市場焦點所在，股友更笑指：「幾乎只要係仙股，都有一番炒作咁滯喎！」