本文重點
去年中獲政府高層高調支持成立嘅商交所，記得當時成立時風頭一時無兩，主席張震遠固然一躍成為大紅人，公職多籮籮，而佢嘅左右手，當時任職總裁、來自紐約商品交易所（NYMEX）嘅唐馬思（Thomas McMahon）亦對商交所前景抱有好大期望。
事隔大半年，原來唐馬思已悄悄離任，商交所日前公布，已委任前紐約商品交易所副主席艾伯特（Albert Helmig）為新任總裁，帶領商交所所有常務工作。
話今個月有新嘢講
商交所嘅baby（首隻產品燃油期貨合約）未出世，總裁就換人，自然會令人有好多聯想；加上早前中證監反對、金融海嘯又令不少投資銀行打亂陣腳，入股可能縮沙。原定今年第一季開始投入營運嘅如意算盤肯定要推遲。
不過，張震遠仍然氣定神閒，繼續大派定心丸，話今個月就有消息公布，叫大家耐心再等吓。大家再等吓冇問題，但相信商交所嘅員工比大家更心急。