本文重點
港交所（00388）老臣子之一嘅結算科主管盛善祥，尋日正式退休離開港交所，展開人生另一章，接替盛善祥嘅係港交所出名靚仔嘅現貨結算業務部主管馮炳賢。
據聞，馮炳賢係港交所數一數二嘅靚仔，港交所內部早有談論，連盛善祥都有聽聞過！絲絲立即翻開港交所嘅季刊，○六年四月號嗰期咁啱訪問結算科行政人員，其中一名就係馮炳賢，的確係一表人才。
第二梯隊馮炳賢接棒
馮炳賢○一年加入港交所，一直擔任現貨結算業務部主管，今次獲委任坐正結算科，算係近年港交所提升第二梯隊嘅例子，馮炳賢將向港交所營運總裁葛卓豪匯報。
馮炳賢加入港交所之前，由九一至○一年任職一家國際銀行，離職前為香港區財務總監，佢係特許金融分析師，亦係澳洲合資格特許會計師。
執「證券無紙化」攤子
未來結算科將有不少工作計劃，重頭戲自然係重新啟動證券無紙化，政府亦將會成立工作小組，港交所亦構思新股設綠表，方便個人名義投資者可以即日沽出新股。但建議一出，已引起過戶處同經紀業界議論紛紛，話可能會影響白表同黃表生意，睇嚟馮炳賢上任後都有大把挑戰。