日股昨日係年結大日子，早段係威係勢，但收市倒跌，感覺如強弩之末，港股一度倒跌，最終仍錄得逾百點升幅，恒指重上13,500點，藍籌表現好壞參半，但股仔炒到出煙。古晨開始對大市有戒心，除咗「秋官效應」外，仙班股仔咁炒法，反映反彈浪接近尾聲，要有離場準備。
金價在900美元似乎守得幾穩，相信係投資者為美元或出現貶值先買保險，黃金股有避險作用，可趁跌市入番些少。花旗日前唱好瑞金礦業（00246），建議買入，目標價為7.7元，較現價仍有兩成幾上升空間。
目前金屬價格雖較疲弱，但集團產能提升，仍有助刺激盈利及現金流，隨着瑞金未來兩年產能可提升超過3倍，純利亦可望錄得3倍過外的增長。由於瑞金可選擇行使新疆兩個金礦的權益，加上赤峰資產的收購，亦會成為未來業務的增長動力。