本文重點
復活節就快到，商場嘅推廣活動陸續出籠，信和物業管理（商場推廣）總經理蘇蔡潔蓮同Vincent講，信置（00083）旗下奧運站奧海城、屯門黃金海岸同小西灣藍灣廣場，今年一共用超過300萬元做節日宣傳，預期四月十至十三日，3個商場嘅人流會去到228萬人次，營業額3,160萬元，可望分別比舊年升20%同10%。
金融海嘯下，大家預咗今年要守，所以佢話為求開源，旗下嘅奧海城推廣部將會喺四月首次幫客戶做公關推廣活動，依家仲同另外5個客戶傾緊有關嘅服務計劃，包括公共企業同保險公司等等，預期每年嘅收入會有800萬至1,000萬元。
首季摸售 六成輸錢
舊年金融海嘯突然湧至，令樓價在短期內急挫兩、三成，令到唔少去年或者之前買入樓花作短炒的投資者，喺今年年初要損手「摸出」單位，中原黃良昇話，總結今年首季到依家，共錄到96宗已知買入價的住宅「摸售」個案，但當中只有36宗有幸獲利離場，獲利比率只得37.5%，數字係近十年半以來新低，即係仲衰過○三年沙士時期。
黃良昇話，摸售獲利比例已經連續四季下跌，而今年首季約佔六成嘅蝕讓短炒個案來自樓花轉賣個案，相信係大型新盤入伙在即，唔少炒家急欲出貨，惟有減價求售。
（Vincent Lau）