麥明詩讚李慧詩：超級勁！
「牛下女車神」李慧詩在東京奧運場地單車女子爭先賽奪得銅牌，為香港爭光，一眾香港藝人紛紛在網上隔空祝賀，包括張繼聰、余香凝、連詩雅及姚子羚等。而身在東京採訪的方力申都相當興奮，睇住電視支持李慧詩，見到對方贏得銅牌，狂嗌：「Yes Yes！She got it！」
至於2019年曾展開跨國單車之旅的「十優港姐」麥明詩，前日上載2016年在里約奧運與李慧詩的合照及在練習場練車片段，留言：「其實超級超級攰（因為一定要保持速度先確保唔會跌落嚟）同埋幾驚，連續踩了5個圈已經覺得想死，呢排睇電視，有時見到啲運動員踩幾踩就輕鬆一個圈……其實自己試過係勁辛苦，anyway重點係……李慧詩真係超級勁！」