洪永城天黑即收工 傅嘉莉怕「陰」招 10道平安符護身

洪永城、C君、傅嘉莉及鄭俊弘等昨日出席無綫靈異劇集《凶宅清潔師》拜神活動，Tony今次除了演出外，更是首任監製，坦言壓力大：「原來好辛苦，好多嘢要處理，好彩有C君互相扶持，公司嘅監製亦畀咗好多意見，咁就放心啲。」

而傅嘉莉透露曾有靈異經歷，所以心存畏懼：「Tony提供咗啲平安符畀我哋，我之前搵師傅都畀咗好多護身符我，差唔多有10個，我將啲符掛晒喺腰，拍完劇返到屋企又會檻火盆。」她透露經常要去荒廢學校、準備拆卸的樓宇及軍營拍攝，在現場換衫及如廁時不敢關門。

C君要老婆接放工

至於C君做監製之餘還負責編劇，他直言向來很怕靈異題材：「我度完橋唔敢揸車或者一個人搭（車立），有時做到凌晨收工，會叫老婆落嚟接我。佢就算一個人睇恐怖片都唔驚，所以係個指標，我會將啲嘢畀佢睇，問佢驚唔驚，其實冇乜嘢嚇到佢，佢連我都唔驚！」Tony笑言要在日落前度劇本，日落就收工，又表示是為了令C君克服恐懼才叫他負責編劇，慶幸劇集已拍畢大半，至今沒怪事發生。