重新上市多人追 康子妮霸氣：冇嘅話我食屎啦！
回復單身的康子妮（Lily）近日參與ViuTV節目《中女唔易做》，挑戰做樓面侍應，期間因難以適應工作而爆喊，坦言因自責累事：「覺得做兩日嘢會影響到人哋生意，我諗到自己咁大，成日都自責得好緊要。」至於問到去年跟林曉峰結束18年婚姻可有自責？她沒有正面回應，只表示現時做每一件事都會瞻前顧後，不會輕舉妄動。
雖然婚姻觸礁，Lily依然相信愛情，自言對人及事物的看法都有新定義，會更加珍惜身邊人，更漏口風指準備好再投入愛情：「有啲嘢timing到就會有，我唔排除，但要時間上允許。」提到跟保險業上司Garry的緋聞，她大呻聽見都頭痛：「無論做乜都好，even我話畀你聽我唔做artist啦，傳媒咪一樣會寫，其實做呢行就係咁。（嚇怕同異性相處？）如果咁諗就慘啦！我要去火星先得！有啲嘢我唔使解釋，自己知咪得囉，最緊要係我爸爸媽媽知咪得囉！」
仔仔支持覓第二春
問到現時可有追求者？Lily霸氣地說：「都有(口架)，喂呀！如果冇嘅話我真係去食屎啦！真係好唔得！」並爆身邊有幾名追求者，若工作後有時間，加上覺得相處OK，都可嘗試發展，而目前先做朋友：「我哋呢啲年紀又拖住兩個仔，唔係咁易搞嘛！（仔仔支持？）大家有共識，我唔會做一啲嘢傷害佢哋，基本上我做嘅嘢佢哋都支持，如果真係有異性朋友覺得幾好嘅，我會介紹畀佢哋識。」