組合ERROR成員肥仔（梁業）前日驚爆與初戀女友阿芬8年情玩完！女方於社交平台出Post宣布「分」訊，坦言雙方因了解而分開，更大方指會互相祝福對方。但有心水清的網民重提堪輿學家七仙羽（七師傅）月初於ViuTV節目《晚吹︰有酒今晚吹》曾爆料，篤爆肥仔一早吼住練美娟（娟姐），如今搞到娟姐成第三者嫌疑人。
七師傅受訪時直言只是說笑，又幫手澄清︰「2人根本一毫米嘅可能都冇，更何況娟姐喺節目入面已經嫁咗畀伍仲衡。」並不忘大讚肥仔好男人︰「與其介紹畀娟姐，不如留畀我自肥，可以有時陪我拍吓節目或廣告。」而肥仔被問到分手是否牽涉第三者時，他以私人事為由拒絕回應，而另一「當事人」娟姐則笑言一切都只是七師傅酒後亂講。