周嘉洛重手打腫臉 陳瀅伺機報仇

藝人周嘉洛、陳瀅、王灝兒（JW）、朱敏瀚、曹永廉、麥美恩等昨日在將軍澳電視城為新劇《痞子殿下》進行開廠拜神儀式。劇中嘉洛與陳瀅一個捱打、一個粗魯郁手郁腳，他笑說：「我負責畀佢打，不過有場戲打番佢，仲錯手打腫咗佢塊面，好應，搞到我好愧疚。」陳瀅笑謂未來數月進行拍攝，會隨時「報復」。

嘉洛拍攝處境劇《愛．回家之開心速遞》多年，首次拍攝連續長劇的他指演繹上要慢慢探索，問到原本飾演其角色的無綫高層王祖藍可有來探班給意見？他說：「暫時未有，佢都有好多公司嘢忙，不過監製畀咗好多意見我。」講到2人劇中親熱戲，陳瀅笑說：「有場比起落水戲仲激，會有好親密嘅接觸，哈哈。」

JW笑點低累NG

而首次拍古裝劇的JW自言笑點低，拍攝時經常忍不住笑要NG，但沒有錯口講了英文，還踢爆拍檔：「嘉洛同陳瀅尋日先講錯咗Sorry。」JW坦言以前做歌手不明白拍劇辛苦，現在終於體驗到，並說：「朱敏瀚幫咗我好多，佢好努力，劇本上做咗好多功課。（獻出螢幕初吻？）冇。（男友唔畀？）呢套講我哋puppy love，所以唔會有。」朱敏瀚則估不到連古裝劇也要騷肌，笑說：「除咗有沖涼戲，練功又要除衫，拍之前要脫水，喺炎熱天氣下脫水係比較辛苦，仲辛苦過之前拍《拳王》。」