李佳芯任摸 滿足遐想

myTV SUPER明日將踏入5周年，為隆重其事，昨日在將軍澳電視城舉行《myTV SUPER 5周年．myTV Gold快樂 Triple Up》記者會，逾20名藝人出席支持，包括李佳芯（Ali）、蕭正楠、方力申、馮盈盈、麥美恩、菊梓喬、鄭俊弘、敖嘉年、蔣家旻、蔡潔及簡淑兒等，推介不同類型的全新節目。

麥美恩恨雙向發展

「myTV SUPER original至享受」將在myTV Gold搶先播出原創劇，由鄭丹瑞、敖嘉年及蔣家旻主演的《欺詐劇團》今日上架，下周五緊接推出Ali、陸永、馮盈盈及麥美恩主演的劇集《智能愛人》。Ali與麥美恩受訪時直言沒料到劇集這麼快播映，大感期待。

Ali劇中飾演機械人，笑言沒想過要打到飛起，變身打女，提到宣傳片中被麥美恩摸胸「抽水」，她笑說：「戲中好似任人魚肉咁！因為我係機械人，所以畀人摸、掂都唔可以有個人情感反應，好似『你嚟啦！』自己從來未試過咁自信，角色滿足到男士對機械人嘅遐想。」

而麥美恩獲無綫力捧做一線花旦，將與黎耀祥及鄧萃雯拍攝新一輯《巾幗梟雄》，她說：「自己都好期待，做主持得到肯定，亦希望演員可以提升自己形象，希望雙向發展！」

至於「Shaw Production至啱傾」由方力申與唐劍康（當奴）聯手炮製節目《鬼上你架車》，號稱史上「最恐怖」鬼古節目，他們碌盡人情卡，每集邀請不同嘉賓遊車河講鬼古。小方與馮盈盈齊齊受訪，笑言拍攝時被聲浪震聾：「連當奴都話原來馮盈盈真係咁嘈，當時仲要喺車上面，冇得走！」問到可擔心恐怖節目變成搞笑節目？小方說：「唔怕，亦冇諗過同其他台同類節目比較，所以冇壓力。除咗盈盈，仲有唐詩詠、張繼聰、蔡潔等做嘉賓。」

馮盈盈「聲煞」驅鬼

盈盈自言極怕鬼，由小到大未曾完整看過一套鬼片，但節目中被主持整蠱，嚇到花容失色！講到在台下笑言要向高層樂易玲自薦拍攝古裝劇，她表示自己一身打扮很像俠女，而且對古裝劇很有興趣。小方搭嘴笑指古裝街很猛鬼，盈盈即笑言可用「聲煞」驅鬼！