增磅過「肥」年 謝嘉怡「出貓」寫揮春
應屆香港小姐冠軍謝嘉怡（Lisa）、亞軍陳楨怡（Celina）和季軍郭柏妍（Rosita）齊齊感受傳統氣氛寫揮春賀歲。以為用毛筆寫揮春會考起「鬼妹仔」Lisa，但她竟是寫得最有信心的一個，更豪氣地表示不需練習，即席揮毫大呼好玩。不過原來她有備而來，拿住手機「出貓」照住寫「大吉大利」，快而準！
英國來港的Lisa因疫情關係未能與家人團聚，慶幸新年有嫲嫲及親友相伴，她更愛上賀年食品角仔，笑說：「選美之後都肥咗幾Kg，不過唔理咁多，3月先再keep fit。」Celina表示過年有依習俗年三十晚用碌柚葉沖涼，但自爆到外國讀書時就「冇王管」，大年初一也照洗頭。肖牛的Rosita今年犯太歲，打算攝太歲化解，祈求一切順利。
