朱慧敏揸「煮」意冧老公

朱慧敏（Queenie）上月下嫁心臟科權威陳良貴（Jason），正式成為幸福人妻。兩夫妻婚後首次孖住接受訪問，向本報讀者提早拜年，祝大家身體健康。Queenie笑言第一年以陳太身份派雙封利是，希望其中一封利是印有自己姓氏：「我問Jason可唔可以畀我派一封姓朱、一封姓陳，我想保留作為朱小姐嘅身份，只係多咗一重身份，就係陳家新抱、陳太太。佢話冇所謂，可能佢喺外國長大，所以好多事都包容我。」

「女性機能似20幾歲」

問到造人大計進度？Jason說：「本身結完婚想有1、2年同太太去旅行，不過我唔反對有小朋友，順其自然。」Queenie表示經常被人「催生」，但堅持按照自己的計劃：「我以前計劃好多嘢，但時機未啱就未啱。我18歲以為自己25歲結婚，但冥冥中自有主宰。所以生BB唔好被年齡限制，時機到，上天就會送呢份禮物。起碼依家我做身體檢查，醫生話我啲女性機能仲係20幾歲。」

Jason激讚太太廚藝出色。

朱慧敏專心發展事業，暫時無意生B。

她透露平日多數親自下廚，拿手菜式是番茄炒蛋：「我好珍惜佢雙手，畢竟佢做手術時間好長，佢從來冇要求我煮，但我想佢返屋企好好休息。佢每次畀嘅反應令我好有滿足感，更加有動力。」Jason即冧老婆：「我真係鍾意食，愈簡單愈好。」

分享有「營」貼士

近日兩公婆頻頻做直播分享健康資訊，Jason預先分享新春有「營」貼士：「一般椰汁糕、糖冬瓜等賀年食品糖分好高，有機會增加心血管疾病風險，我建議可以食，但要注意分量，依家有新潮嘅禮盒代替，放果仁、無鹽嘅腰果，既健康又可以招呼客人。」