陳煦凝羅雪妍 戀渣男中伏
參選2020年港姐的陳煦凝（Amber）、張盈悅（Joyce）及羅雪妍（Uki）因選美成為好友，齊齊加入娛樂圈。現時3人同是單身，當中Joyce自嘲是「未發展國家」，戀愛經驗值為零；另外2個「發展國家」Amber與Uki就同在情場上遭渣男傷害。講到擇偶條件，她們揚言不重外表，只重內涵。
陳煦凝、張盈悅及羅雪妍參選港姐雖未能進身三甲，但仍獲無綫垂青，羅致旗下。提起「港姐魔咒」，有指選完就會與男友分手收場，曾被拍得與男友行孖咇的Amber原來已甩拖：「嗰個散咗，唔關我參選港姐事，其實之前唔算係真拍拖，係了解發展中。」Joyce聞言發揮搞笑本色：「人哋係『發展中國家』，我呢啲係『未發展國家』，好落後！我未拍過拖，所以咪話想拍偶像劇囉！」
衰花心！靚仔免問
同樣單身的Uki透露拍過3次拖，更愛上渣男：「渣嗰個反而係最鍾意，細個鍾意壞男孩，好有戀愛感覺，喊到癲咗，又鍾意到癲咗。」Amber自言亦遇過渣男，對方很快就見異思遷，她指現時的擇偶條件是靚仔免問：「同靚仔一齊壓力好大，太多人鍾意，而且靚仔多數好自大，所以正常樣、順眼就可以。最好係外表文青，內裏搞笑。（渣嗰個係靚仔？）唔係靚仔，但唔靚仔都可以渣。（咁應該搵個靚仔？）靚仔又唔會揀我哋，靚仔好多人追。」
Uki亦表示擇偶不看重外表：「我對外形冇要求，鍾意嘅都係比較奇怪，順眼就得，仲要孝順，咁樣心地唔會太差。（怕唔怕另一半係『媽寶』？）我都係『媽寶』，所以冇乜所謂。」至於Joyce就喜歡有主見及有紳士風度的男生，對另一半的家人亦有「要求」：「要尊重女性，可以證明佢家人嘅人品唔差，因為戀愛唔係兩個人嘅事，好複雜，唔想諗，30歲先諗。」