馮盈盈鄭衍峰尷尬留條罅

汪明荃、黎諾懿、馮盈盈、龔嘉欣、高海寧、陳曉華及孔德賢等，前晚出席《big big shop新春感謝祭》活動，被指有「新歡」的盈盈與「舊愛」鄭衍峰同場碰面，未見有太多交流，在場傳媒邀請兩人合照，雖然他倆一口答應，但卻面露尷尬之色，當衍峰步近時，盈盈有開口Say Hi，惟並肩而站時卻有一大條罅隙，之後盈盈便擺港姐甫士叉腰，衍峰則硬晒軚。

事後盈盈受訪時否認尷尬：「唔覺得呀，我有打招呼！（佢話請過你食2百幾餐叉燒飯喎！）食嘢講啱唔啱食，唔係計錢嘅。」對於「新歡」曹展康（Bobby）被起底，乃地產公司執行董事，姐夫更是「舖王」，來頭相當猛料，問到可感打擾對方？她說：「呢位朋友好大方，覺得食飯冇乜問題，冇放心上，但大家對我呢方面咁有興趣，我真係會孤獨終老！」更指不知對方工作及身家背景，就連對方感情狀況也不知情。問到是否她的理想型？她說：「真係食餐飯冇諗咁多，請教佢投資意見。如果之後有朋友繼續敢約我，我唔使開工都會出去，係正常社交，但最近疫情嚴重番，就會睇情況減少。」

孔德賢否認搞地下情

而孔德賢對於與落選港姐廖慧儀分別上載屋內整嘢食的相片，被踢爆一齊玩煮飯仔，他否認搞地下情，揚言雙方僅同場零交流：「嗰晚係有個共同朋友嘅生日派對，上到去先至知佢喺度，但都冇乜特別交流，過去就由得佢過去。如果我有嘢唔會白癡到咁樣Po相。（依家冇聯絡？）冇啦！之後都會避忌啲，會問清楚有啲乜人先。」

至於無綫助理總經理余詠珊，對於曾志偉上任當無綫副總經理，她表示已一連兩日與對方開會：「佢了解吓我哋做緊乜，大家合力做好TVB，都好開心佢返嚟，好似多咗個大佬咁，好開心又一齊做嘢，等新年過後佢返嚟會坐低傾今年未來嘅嘢。」更指志偉有人脈，於內地有影響力，相信未來節目能邀請更多藝人參與。