盈盈約男伴食貴嘢 鄭衍峰證地位：我請咗佢200幾餐！

馮盈盈否認撐枱腳的男伴是新歡。

繼被傳與鄭衍峰於電視城爭吵驚動高層後，盈盈近日被發現約會西裝男歎貴價意大利菜，盈盈受訪時連聲否認是新歡：「只係普通朋友啫，我向佢請教投資意見，順便食飯。討論完公事先閒談咗幾句，畫面誤導咗大家嘞。」她將這個「美麗的誤會」歸咎於禁聚令：「依家只准兩人一枱，咁一定係撐枱腳啦。見面食飯都要講到係新歡？有冇考慮過我朋友感受？我隨時拉低佢可發展對象嘅平均質素喎。」

桃花夠多唔使買

而鄭衍峰昨午現身電視城，與戴祖儀等出席節目《港產旅行團》記者會。他輕鬆回應：「我都係入到嚟先知呢單新聞，未有機會了解，咁朋友約食飯都好正常啫。（嗰餐飯食咗3千蚊！）我諗咁多年我喺TVB canteen請佢食飯，加加埋埋都唔止呢個數啦，有200幾餐o架！」他坦言近日與盈盈各有各忙。當記者指對方生活得精彩，他即謂：「咁我都好精彩，拍節目時有戴祖儀同林穎彤呢啲靚女陪住，發現咗好多香港嘅隱世風景。（咁新年前會唔會約盈盈去買桃花？）嘩，我哋已經好多桃花，唔使買嘞！」

鄭衍峰即場晒肌肉，莫非是向「情敵」騷Quali？

曾淑雅於節目中大騷身材，昨日先露纖腰小試牛刀。

戴祖儀曾淑雅共浴

另外，《港》節目內戴祖儀與曾淑雅有「出浴」鏡頭，祖儀透露：「我哋被安排去咗酒店staycation，有機會望住靚海景出浴。當時我披咗浴巾下面仲有泳裝，曾淑雅對披毛巾好熟手，教咗我點整之後點扯都唔甩。」