李昭南人細鬼大 小學玩暗戀
藝人李昭南（Mishy）自小在跑馬地成長，就讀傳統名校，雖然成績不太突出，但卻熱衷課外活動，更愛越級挑戰老師，令老師大感頭痛。講起昔日情史，Mishy自爆小學5年級時「暗戀」一名失明哥哥，幾乎每日接送對方搭巴士回家，但卻沒有勇氣介紹自己，令「戀情」無疾而終！
就讀名校 愛課外活動
Mishy近年幕前工作多多，除參加《全民造星Ⅲ》外，又在ViuTV劇集《暖男爸爸》飾演按摩女郎Nami，大騷36C「Big」爆上圍。有樣有身材的她亦有內涵，就讀跑馬地傳統名校瑪利曼小學及中學，她笑言最愛坐電車發白日夢及欣賞風景，並自爆當年不是勤力學生，但卻熱衷課外活動，是學校的活躍分子：「我喺瑪利曼由小學1年班讀到中4，之後去咗美國讀書。小學頭4年都係考尾20，但之後5年班唔知點解開竅，考番頭10名，勁大反差！中學嗰時參加合唱團、女童軍同戲劇，又會參加鋼琴比賽，同時又係女童軍隊長，太多嘢做，上堂就冇咁專心，不過成績都唔係差嘅。」
打爛沙盆唔啱就要問
她自稱當時屬「難搞分子」之一，但強調不是品行差，只是愛挑戰老師，令老師大感頭痛：「我真係會問老師點解要做呢份功課，我想知學到啲乜，我先會去做，所以啲老師見到我好頭痛。有次測驗，我睇到條題目啲邏輯怪怪哋，我就拎住份卷問老師，話呢個邏輯唔啱，諗番起真係想同老師講對唔住，哈哈！」
巴士情緣 盡在不言中
就讀女校多年，Mishy坦言曾出席聯校活動認識異性，但卻因怕醜而未有行動。不過她自爆小學5年級，在灣仔邂逅一名失明哥哥，經過1年相處，便對對方「動心」，她說：「小學5年班係讀下午班，有一日見到戴住太陽眼鏡嘅失明哥哥，我埋去問佢要去邊，佢話要去搭咩號碼嘅巴士，我扶住佢去巴士站。之後每日放學都見到佢，都會扶佢去巴士站，但大家冇講嘢。（哥哥係咩人？）我估係大概30幾歲嘅上班族。」
忐忑不安心動冇行動
Mishy續稱：「有次我架車遲咗到灣仔，見到已經有個叔叔扶住佢過馬路，但嗰陣係紅燈，我見到勁激動，即刻衝埋去鬧個叔叔，我話見到紅燈仲帶人過馬路好危險，個叔叔可能覺得我係傻！我帶哥哥過馬路去巴士站持續咗1年，但我小6變咗返上午班，當時臨放暑假之前心情好忐忑，究竟好唔好介紹自己呢？最後我都冇介紹，所以哥哥都唔知我係邊個。當時覺得哥哥好靚仔好斯文，又有禮貌，所以心動咗，產生咗仰慕嘅感覺，不過我小6之後都冇見過佢。」