龔嘉欣大包圍爭后 張振朗感觸冇嘥心機

龔嘉欣以多劇谷人氣，爭「視后」有冇着數？

張振朗與龔嘉欣擔正的劇集《堅離地愛堅離地》3年後終走出「雪櫃」，昨日他們宣傳時表示相當大感觸，振朗說：「套劇係我哋第一次做男、女主角，擺咗好多心機落去，拍到後段冇覺訓，喺公園石櫈都瞓得着！」

今年有4套劇出街的嘉欣，繼《香港愛情故事》後再有作品，為爭「視后」增添聲勢，她說：「希望保持人氣，今次演富二代，角色有唔同感覺，希望大家覺得我值得有咁嘅成績。」又表示不擔心「自己打自己」，笑言是大包圍。

張振朗為新劇捱到瞓公園。	大會海報冇黃心穎，監製坦言想低調啲。	劉佩玥化身聖誕女郎賣萌。

劉佩玥辛苦忍笑

而「女三」心穎由宣傳片至現場布景板也被Out，自然冇份出席宣傳，但劇集監製吳冠宇表示沒有刪除其戲份，問可擔心對方拖冧收視？他說：「希望低調處理，唔好再Highlight件事。」並透露心穎戲中與謝東閔、丁子朗有三角關係。

至於陳智燊離巢2年後返娘家宣傳，感覺複雜。劇中他與劉佩玥一對兼有親熱戲，笑言最初被女神外表呃到，原來相當嘈吵！劉佩玥亦讚他搞笑，開工最難是忍笑。