蔡思貝攬張曦雯：一世好朋友！
藝人張曦雯與蔡思貝近日被傳姊妹反目，昨日兩人現身活動時攬到實玩遊戲粉碎傳聞，前者稱兩人私下有相約見面，後者更揚言是一世好朋友，力證友情不變！
蔡思貝、張曦雯（Kelly）、張振朗及姜麗文等昨日出席《踩過界II》宣傳活動，最近有指思貝與Kelly因王浩信而反目，昨日兩人未受傳聞影響，攬頭攬頸玩遊戲，她們受訪時否認不和，思貝稱看到報道時一頭霧水：「好朋友唔係睇表面，在心中，曾經好朋友，一世好朋友。」Kelly亦附和：「話我哋社交網站冇互動，我食飯瞓覺都冇甫相，但唔代表我冇食飯瞓覺，我哋上個月仲一齊遊船河。」
問到有否如報道所言有提醒Kelly小心浩信「溝女王」？思貝反問：「呢啲喺邊度嚟o架？」Kelly指大家都是專業演員，男方亦非溝女王。至於劇集會否有機會開拍第3輯，思貝坦言不知情：「我問吓監製，同佢講我想要嘅聖誕禮物係開第3輯。」
張振朗角逐視帝打定輸數
另外，張振朗憑《反黑路人甲》提名視帝，問到信心如何？他斷言：「唔使諗，冇可能，我睇好黎耀祥同王浩信，我仲要浸淫吓。頒獎禮當晚我做觀眾拍手掌。」對於未能跟賴慰玲入圍最受歡迎電視拍檔感遺憾，但有觀眾記得已足夠，現時忙拍《拳王》的他透露前日拍攝打擂台戲份時被拳手一拳打到跪低。