陳豪拒愛：我係正人君子
劇集《愛美麗狂想曲》一眾演員陳豪、李佳芯（Ali）、陳瀅、蕭正楠、曹永廉等，日前接受由伍詠薇及林盛斌主持的節目《Tiger's Talk》訪問，當談到有關助手的難忘經驗，大家均暢所欲言，妙語如珠。陳豪自爆多年前曾經被助手戀上：「佢跟咗我大約兩年，我完全唔察覺，佢係一個好能幹嘅女仔，成日都會想出唔同辦法去幫我，佢話我知佢鍾意咗我，不過我當時有女朋友，都唔係好記得自己點答佢，但我都有自省係咪做咗啲咩令佢誤會。我只能夠講我係正人君子，我冇炒佢，後來佢自己辭職。」
陳瀅被牙醫拍髀
陳瀅則指於溫哥華做牙醫助理時，曾遇過一次懷疑「#metoo」的經歷，她表示：「牙醫陪我溫習嘅時候，突然用手輕拍咗我大髀一下，當時感覺怪怪地。」蕭正楠則難忘在內地聘請的男助手，對方長期娘娘腔兼陰聲細氣，喜歡超近距離「咬耳仔」交談：「我唔知係佢貼心，定真係貼心得滯，我換衫，佢就趕晒啲人出去，但佢自己唔出去囉！」
李佳芯助手撞車
Ali的經驗就最新鮮滾熱辣，發生在訪問之前一刻：「助手啱啱撞咗我架車，可能佢比我仲心急，怕我遲到，倒車時唔小心。轉個頭佢買番杯咖啡畀我就算，唔會叫佢賠。」