何雁詩苦盡甘來成功「破處」
剛做人妻的何雁詩對新身份仍感陌生，最怕一不留神露出「破綻」被寫成「婚變」，故時刻保持警覺！獨行歌手路1年的她對成績相當滿意，最開心能一嘗「破處」滋味，一夜蛻變成長！
何雁詩婚後急急復工宣傳新歌《基本戀愛套路》，戴着婚戒Sweet爆受訪，問到婚後甚麽變化最大？她笑說除了要適應被稱「鄭太」，戴婚戒亦令她大感「困擾」，因她深怕脫下就會被指「婚變」，故跟老公鄭俊弘甜蜜協議：「做嘢都要戴住，只係沖涼唔知除唔除好。」她又自爆受訪當日才正式完婚，而最後的手續竟是在診所完成：「婚紙仲有嘢要補簽，因為陪朋友去睇醫生，就叫律師拎去診所簽名。」
開騷跳Cha Cha
阿詩去年毅然離開星夢成獨立歌手，自掏腰包造3首歌，1年後她笑住呻：「好辛苦！好窮！」但亦大感滿足，沒有後悔離開前公司，因這個過程令她更認識自己，在音樂路上找到新發展方向，成功「破處」：「發現自己可以寫歌，多咗好多自信，依家好享受造音樂嘅過程，記得番當初做歌手嘅原因。今年總共出咗4首歌，仲第1次有歌上咗4大平台，可以話係破咗處！今年係歌手生涯中最有紀念價值、最難忘嘅1年。」
問阿詩之後是否繼續做獨立歌手？她笑說要從長計議：「唔係唔可以，但要搵個經濟實惠嘅方法，因為真係會冇錢！」她再訂下新目標，希望明年初開個人處女騷，現正籌備音樂會主題曲，還承諾屆時會為Fans帶來全新的何雁詩：「可能會跳舞，哈哈！呢個會係最大嘅挑戰！（性感舞？）跳舊舞，Cha Cha嗰啲！如果我肯喺台上跳舞，係好大嘅突破。」