許芷熒開Turbo生4個

許芷熒（Whitney、前名許亦妮）昨日下嫁做生意的圈外男友Alex Fung，昨晨進行接新娘儀式，前港姐梁麗瑩擔任伴娘，蔡思貝、陳曉華、李松蔓、何依婷及葉蒨文等擔任姊妹，身穿中式裙褂的Whitney明艷照人，周身金器，戴了八隻龍鳳手鐲，頸上則掛了幾隻金豬及金鐲。

愛「偶像」一世不夠

昨晚婚宴筵開40多席，新人於傍晚見傳媒，Whitney所戴的鑽戒閃到爆，兩人在記者要求下咀嘴半分鐘，冧爆的Alex更多次忍不住錫老婆臉珠，又放閃光彈：「我哋經歷嘅嘢真係幾浪漫，我承諾一世愛老婆，會畀晒好嘢佢！」Whitney說：「我會一世仰慕同尊敬我老公，要維持關係，要當對方No.1偶像。」並相約下世也要再見，此時新娘已眼濕濕。問到是否開Turbo造人？Alex表示嫲嫲希望有兩個「好」字，Whitney即說：「你OK我OK！」又說蜜月會留待11月生日時一同慶祝。

甜蜜咀嘴	閃爆鑽戒	許芷熒周身金器與一班姊妹合照。

婚後Whitney不會做全職少奶奶：「我會做YouTuber分享煮嘢食。」Alex即笑言老婆廚藝了得，令他減肥失敗。

蔡思貝感動到喊

蔡思貝跟Whitney於2013年認識，感情深厚，指新人簽字期間，各姊妹也感動到喊：「我本身忍得住，之後都匿埋一二角喊，我係浪漫嘅奴隸。（花球畀圈外姊妹搶到？）我依家同事業拍拖。（因為緋聞男友余德丞畀人爭咗？）我冇咩留意，佢生日都有Message佢，會約佢食生日飯。」此外，前晚Whitney上載與老公的文字對話截圖，Alex表示不習慣單獨睡而失眠，Whitney就冧爆指見少一晚都掛住，又期待起身見到老公，相當骨痹！