黎諾懿火燒睫毛 搵老婆補鑊

黎諾懿、陳敏之、陳詩欣及陸浩明等昨日出席無綫「big big shop超級感謝祭」記者會，諾懿與敏之近日為主持煮食節目頻頻曝光，同時也因此獲帶挈賺外快機會。

有兩個煮食節目孭飛的黎諾懿，早前錄影時因落多了油搶火險生意外，豈料近日又再發生驚險事：「其實都係玩火之過，嗰日煮焦糖蘋果，開頭以為冇乜嘢，個畫面又靚，點知突然間個火燒咗上去，眼睫毛燒燶咗少少，返到屋企都要老婆幫我修剪，頭髮又燒燶少少。」當時在場的敏之也坦言過程驚險：「我真係要小心啲，以後同你一齊做煮食節目會企後啲避吓。」

陳詩欣內定搶花球

而陳詩欣談到好姊妹余香凝將於本周六舉行婚禮，身為姊妹之一的她會盡力幫忙，問到屆時會如何玩新郎？詩欣笑說：「佢唔會想我哋玩佢老公，要錫住，同埋佢老公真係對佢好好。」問到會否搶花球？她說：「當然，佢話會留畀我，知好多人爭。（想快啲嫁？）又未，但同男友都感情穩定。」

同場的陸浩明表示有發短訊慰問喪夫的肥媽，他說：「睇完肥媽條片仲好擔心佢，丈夫突然離世，情緒係波動好大，知佢好難過，但佢都話多謝大家對佢嘅關心。（肥媽話唔想見人！）一定會，佢同丈夫好恩愛，係覺得好傷痛，畀啲時間同空間佢處理。」陸浩明指已收到肥媽通知，喪禮將於本月17日在香港殯儀館以天主教儀式舉行，翌日在聖若瑟堂大殮，靈柩隨即移到柴灣歌連臣角火花，陸浩明表示到時定會到場幫手。