廖子妤多女埋身情事Open

30歲的廖子妤從小醉心表演，入行12年先後做過幕後剪片、跑龍套、模特兒及演員，期間犧牲了感情生活、離鄉別井，甚至接拍三級片換一個機會，早前終憑電視劇《地產仔》的中性角色「魚哥」而人氣急升，社交網粉絲人數激增逾萬，而且「多女埋身」！她直言：「我唔係紅星，之前社交平台粉絲長時間維持喺某個數，依家多咗咁多人關注係開心嘅。啲女粉絲當我係傾訴對象同樹洞，不停inbox我，但我唔係好敢覆太多人，因為唔想同佢哋hea傾，但自己又唔係有太多時間，總之大家支持，我心領嘅。」

無意效法任劍輝

搖身變成「眾人老公」，當被問到有否考慮與同性發展感情時，子妤爽快地說：「我都有問過自己呢個問題，喺感情生活上我係open（開放）嘅，係愛嗰個人而唔係愛嗰個人嘅性別。不過女仔係超級麻煩嘅，包括我自己在內，我都擔心唔能夠完全貼心咁照顧另一位女仔，隨緣啦！」今次竟以「男士」身份闖出人氣，問子妤是否覺得很諷刺？她說：「呢方面我心態調節得幾好，鍾意唔代表適合，即係等於有人好鍾意整蛋糕，但味覺冇sense，反而佢整車好叻，又唔代表佢鍾意整車喎！我都好enjoy做『女仔』，不過唔適合，做適合嘅嘢咪會有人留意到囉！」說到底她無意效法前輩任劍輝，日後戲路決定「聽天命」。

最欣賞惠英紅

相比好友余香凝，子妤似乎「運氣不濟」，由馬來西亞隻身來港發展踏入第9年，整體成績僅屬一般，今次突然爆出，卻遇上新冠肺炎，結果工作歸零，她卻說：「我都開心嘅，而且唔係第一次咁樣喇！以為有人氣可以keep住，但事實又唔得！記得以前有個前輩同我講，有錢就要儲埋去，呢大半年我都係用緊《骨妹》嗰轉搵落嘅錢，好彩我唔追名牌亦唔大使。依家可能我係冇乜運，但點知將來？我最欣賞係前輩惠英紅嘅不屈不撓，佢之前都喺無綫劇演配角，甚至係人哋阿媽！」

為演戲放棄男友

回想當年來港發展，子妤天真地以為只需逗留3個月至半年，日後便可以在自己履歷寫上「曾經在香港發展」，然後便返回馬國，結果命運安排她一留便9年，更賠上了一段本來發展得不錯的感情：「嚟咗香港年幾先分手，中間只係返過去一次，平時我哋上網聯絡，見番面大家好明顯步伐已經唔再一致！」男友沒了，又與家人長期分開，能夠忍受足以證明子妤視演戲比生命還重要，問到是否想以演員為終身職業，她謙虛地說：「唔係你想就得，都要睇吓有冇機會繼續留低，我都有諗緊其他嘅出路，不過都係同電影有關，能夠以演戲為終身職業，當然係幸福嘅。」

馬國姑娘愛扮日本人

子妤成長於馬來西亞一條偏僻村落，她家兩姊妹都熱愛唱歌，小時候不時於村內公開表演，所以人氣不錯！3歲定80，青春期的子妤成為馬國知名模特兒，她卻自嘲：「我得1米67，喺模特兒界係侏儒，只可以掹車邊走騷。」

如今成為香港演員，子妤則滿腦子怪念頭：「我花得最多錢嘅地方就係上課學嘢，學過雕塑又學過大提琴，不過成日畀人話3分鐘熱度。呢排疫情我就匿喺屋企『練習』，最鍾意扮日本人講廣東話，你又點知呢啲伎倆，幾時拍戲角色要『學以致用』？」