被指埋富貴堆 鄭衍峰為馮盈盈護航

無綫娛樂台主播鄭衍峰出席無綫節目《big big shop 中秋感謝祭》錄影，對於被拍得與馮盈盈孖住出席胡美貽有米男友Reeve的生日P，席間「開綠燈」讓盈盈跟有錢人埋堆混熟，衍峰即為她護航：「如果揀朋友要視乎有冇錢、背景或者紅唔紅，咁我都做唔到佢朋友啦！Reeve係我18歲已經識，盈盈同佢都有共同朋友，我同盈盈、美貽都係同事，美貽做榴槤生意，盈盈又鍾意食榴槤，唔知會唔會有贊助呢？（同盈盈公開戀情咪唔使再惹新聞囉！）大家目前專注工作，節目上係好拍檔。（你連盈盈生理期都知喎！）我只係比較細心，會留意朋友講嘢啫！」至於馮盈盈對埋堆一事，不作回應。