何基佑教大仔下廚學埋人生哲理

藝人何基佑(Kay)在疫情下升呢為「廚神」,不時為親友炮製美食,他說:「我本身都鍾意煮嘢食,疫情下動力大好多,喺『禁聚令』下唔可以一家人出去食飯,就自己下廚。(煮嘢食好叻?)我媽媽係烹飪高手,佢食過一次嘅嘢就可以煮番出嚟,我喺佢耳濡目染下都學到啲。(最拿手係咩?)威靈頓牛柳!」最近更應邀在平台《Towngas Cooking煤氣教煮》中拍攝短片,分享廚藝。

除了媽媽與太太擅長烹飪,Kay透露其5歲大仔已能跟他一齊下廚:「我個仔4歲就揸刀,係小朋友嘅刀,但當然要有家長陪同,煎蛋同煮班(卓戈)係冇問題。」認為一個喜歡烹飪的小朋友不會太頑劣,因在入廚過程中學會按步就班。

工作方面,Kay坦言疫情下司儀工作難免減少,由他製作的育兒節目《超級奶爸》亦未必開拍第四季,反而正在構思新節目:「我係兒童財商課程導師,想製作節目教小朋友點去理財,以及教家長點教小朋友理財,依家做緊前期籌備工作。」