何珮瑜食齋對異性欲望急降

藝人何珮瑜（Jeana）昨日為香港開電視《30分鐘大放餸》節目錄影，親自下廚炮製包餃子和煎雞蛋餅，她指疫情下冇工開，自6月起開始自我沉澱，加上信佛和不想殺生，逐步轉食素，兩個月內變成全素食，她說：「剛開始係11點前食素，慢慢只喺屋企食，到第三步食全素，初時同朋友出街食飯，見人哋食花膠、鮑魚，好香，有啲引誘，依家已經冇欲望，媽咪同嫲嫲都食素，都估唔到我咁快，好似促成班食全素，依家變得欲望低咗。（對異性欲望？）都低咗！唔會好想拍拖，因為我信因果緣分。（怕唔怕緣分都走咗？）唔會啩！」