張寶兒疫後行禮：一切從簡！

藝人張寶兒（Bowie）前晚在社交平台宣布男友袁偉豪（Ben）求婚成功，昨日她在牛頭角一幢商業大廈拍攝新劇《兒科醫生》，約下午3時多，她接受記者訪問，全程心情愉快，明艷照人。講到手上沒有戴3卡求婚戒指，她笑言因要開劇，至於為何求婚一周年才公布喜訊？她笑說：「因為一周年日子比較特別。」提到二人去年在加拿大尼亞加拉大瀑布旅行期間，Ben突然求婚，她強調事前並不知情：「真係唔知，嗰日早上因為我有時差所以同佢去跑步，冇任何計劃，隨緣咁發生。」

至於求婚時二人都感動流淚，Bowie笑說：「其實我唔知佢喊，後尾睇番片先知，我嗰陣好震撼，好似充血上腦咁，聽唔到佢講咩。（因為你淨係掛住望戒指？）哈哈，嗰時睇唔到嘢，畫面矇咗，同想像中嘅情緒、畫面唔同，因為身邊冇其他人，所以冇任何壓力去控制情緒。」講到婚禮，她表示並不心急舉行：「希望大家喺放心、安全嘅環境下享受呢件事。（計劃幾時？）未，構思緊，依家大家都比較忙，我盡力抽時間處理。（最快要出年先舉行到？）希望啦！等疫情穩定啲。（喺香港定外國搞？）睇情況。」她指婚禮只想與家人、至親好友分享，希望一切從簡。

計劃外地影婚照

問到Ben可有向她作出甚麼承諾？Bowie說：「一個婚姻，希望以後一齊行，建立大家嘅家庭。（心急生BB？）唔急，一步步嚟。」當提到之前已影了婚紗相？她即笑說：「嗰啲係fashion相，冇佢。（幾時影？）希望夾到時間，同埋可以外面影。（邊度？）去到再話畀大家知，要安全為上。」