吳澋滔床戰余香凝報恩

現年23歲的吳澋滔2006年於譚家明執導、郭富城主演的電影《父子》中一鳴驚人，以9歲之齡獲獎無數，更連奪台灣金馬獎及香港電影金像獎最佳男配角，成為「雙料男配」！隨即有不少片約招手，但因當時司馬燕想兒子以學業為重，全部推卻！

事隔14年，吳澋滔為電影恩師譚家明「復出」，為對方執導的《七人樂隊》中的「別夜」單元演出，與女星余香凝飾演80年代的學生情侶，除了接吻戲，預告片更見二人裸膊上陣床戰，意識上膽。余香凝對於今次與吳澋滔合作大呼神奇：「我都有睇《父子》，同佢合作，好似小朋友轉眼變咗大人，佢係一位好勤力嘅演員，因為佢唔識中文，起初聽唔明劇本，到之後讀熟咗同了解角色。（拍床戲有冇尷尬？）冇，大家可能會留意咗喺啲內衣、床戲度，但套戲嘅重點唔係呢度，拍之前我哋排咗好多次，我好信任導演同對手。我睇咗完成品，完全冇意淫嘅感覺，係好唯美同好有藝術感，好開心能夠參演一套向菲林致敬同埋集咁多出色導演嘅電影，好榮幸能夠參與譚家明嗰部分。」

愛逛藝術館

而吳澋滔「重返」影圈前，都專注學業。2015年往加拿大升學的他，近年不時於社交網甫相，樣子愈大愈似爸爸，與小時候一樣靚仔，外遊時都愛去藝術館睇展覽，甚有文青氣息。

除了譚家明的「別夜」外，《七》片還集結多位香港名導演洪金寶、許鞍華、袁和平、徐克、杜琪峯及林嶺東聯手執導，其中任達華演出已故導演林嶺東遺作「迷路」，亦是該片焦點之一。