白雲E Cup惹火朋友嫌核突

「35E咪神」白雲今年年初離開效力8年的無綫，原定滿腦子計劃，先到北京拍劇，暑假接拍真人騷，奈何因疫情令所有工作叫停！

零工作 頂得住

她說：「本來3月去北京見劇組搞直播，7月接咗真人騷，個騷依家取消咗，北京劇組易埋角，不過唔緊要啦，正面睇會畀番啲嘢你，就係緣分令我養多咗隻狗，呢半年嚟，佢每個表情我都冇漏。雖然係零收入，靠積蓄生活，但算叫做頂得住。」她承認很難遷就別人，故現時嘗試自己處理工作，包括約見客戶、斟洽酬勞等。對於內地疫情受控，白雲有意到北京碰機會：「內地市場好大，好彩以前啲同學會幫我，我亦有親戚喺上面，預計留半年，總之一有工作就即刻走，隔離完正式出關。同埋北京有演藝課程，到時賺到錢就報讀，我隨時起行，狗狗有屋企人睇住，唔太擔心。」

「中學冇除過冷衫」

談到其35E身材一直成為焦點，她無奈稱某程度上對演出有障礙，試過被人批評她演不到女主角：「有導演講過演路人甲都難，因為身材問題，但我唔認同，現實係咩身材嘅人都有！（出街刻意唔性感？）以前朋友叫我唔好着緊身衫出去食飯，因為唔想畀人望，佢哋仲有惡意嘅眼神，我會唔開心！以前中學冇除過冷衫，仲話啲女仔個胸去到D同E Cup好核突，臀部大又核突！（諗過紮胸？）唔會，對身體唔好，我喺屋企從來唔戴（Bra），着晚裝同沙灘裙都唔戴。」更指試過搭公共交通工具時被人摸屁股，當時忍不住罵對方，惟反被同行家人責怪，令她深感無助！