高海寧索爆上擂台KO王浩信
為了一場打拳戲份，高海寧以一身fit爆身形示人，最終搞到王浩信流鼻血收場。而朱敏瀚亦不甘示弱，以八舊腹肌在浴場拋窒「HeHe檔」張振朗及王浩信。
高海寧（高Ling）於無綫熱播劇集《反黑路人甲》中飾演明星，「戲癡」王浩信視她為偶像，下星期有場講述高Ling拍廣告的戲份，為了這場戲，拍前一星期，她每天只吃無味的白烚雞胸、西蘭花、番薯和雞蛋，務求要腰有腰、要胸有胸，索爆示人。這場戲講述她拍廣告時出拳乏力，王浩信便着她嘗試出力打他一拳，豈料高Ling這一拳卻把王浩信打到流鼻血，十分搞笑。
高Ling指與王浩信合作甚有得着，她說：「佢成日會拋啲新idea出嚟，自己對每場戲嘅想法都細緻咗，拍到後期自己都會掟啲嘢出嚟。（有冇忍唔住笑？）雖然我向來笑點低，但係可能我個角色本身有喜感，投入咗唔會笑，相反如果我個角色係好認真，對方係好搞笑，我就會忍唔住！」
朱敏瀚腹肌搶鏡
而王浩信、張振朗及朱敏瀚於昨晚一集有場浴池晒肌戲份，打手朱敏瀚差點識穿他們的臥底身份，二人扮HeHe求過骨，眾男赤裸上身上陣，有八舊腹肌的朱敏瀚體形最fit。此外，劇中一場「天若有情」HeHe版電單車戲份，只見張振朗冧爆的從後攬住王浩信，張振朗受訪時說：「我個樣其實真係幾引人打嘅，如果對手唔係浩信，我諗我都未必做到，就係想啲觀眾打爆個電視，希望觀眾鍾意。」說到朱敏瀚狀態甚佳，振朗謂：「佢真係好畀心機，見到佢愈嚟愈Man、觀眾又鍾意佢嘅改變，真係好戥佢開心。」