「細龍太」陳偉琪被寸波大冇腦匿埋喊

陳偉琪（Vicky）向來是惹火之人，由參選港姐被指有契爺關照，到最近被指因形象不佳而飛出《愛》劇，雖然監製已作否認，但直認暫時再冇《愛》劇通告的她，依然時刻被是非纏擾，有網友更惡意抨擊她「波大冇腦」！對於這些負面評語，Vicky坦言：「曾經為咗呢啲說話唔開心，但冇表現出嚟，連同朋友都冇去呻，因為我性格係鍾意報喜不報憂。有時谷埋谷埋，會夜晚匿埋房喊，但依家好啲，諗通咗，佢哋唔識我梗係唔了解我，我知自己係乜嘢人就得。」

明年便踏入「29+1」之齡，向來予人感覺都是「享樂型」，社交網分享的大部分都是吃喝玩樂的照片，但其實她亦很喜歡看書、寫詩，還不斷報課程學習新事物，自我增值。看似樂觀的她，自爆曾經歷兩次人生低潮，第一次是她早年拍畢《愛．回家之八時入席》時期，對前路感到很迷失：「因為未知有乜嘢新嘅工作，好迷惘，我好唔喜歡被動、喺度等嘅感覺，會懷疑自己究竟適唔適合呢行，應唔應該轉行？」她又提到手腕上的字體紋身，原來就是在這低潮期烙下的印記，她笑說：「呢個唔係乜嘢男仔名，係拉丁文I Believe，提醒我要相信自己，亦因為諗通咗，所以繼續做（演藝）。」

至於第二個人生低潮，當然要數去年的酒駕事件，Vicky說：「當時真係好慚愧同難過，出事之後返到屋企，爸爸媽媽知我已經好唔開心，雖然好擔心，但都扮冇事好似平時一樣，好明白我需要空間去冷靜，身邊朋友都好好。」她指朋友除了提點她不能再犯，亦予以鼓勵，更主動幫她寫求情信：「佢哋好好爭住幫我寫，令我覺得自己好幸運，出事之後，知道身邊全部都係真朋友。」

男友掛住瞓 約仔睇日出

另外，桃花極旺的Vicky早前不避嫌於社交網上載凌晨4時與男友人出海玩SUP立式划槳，正當外界猜測她與外籍男友甩拖、有新歡登場之際，她卻親證跟男友情未變：「真係唔好意思拖咗個朋友落水，佢係教我玩SUP立式划槳。（點解凌晨出動？）可以睇日出嘛。（咁浪漫咪仲令人懷疑？）日出時間係最靚、最啱玩嘅，加上我住西貢，好方便。（男友有冇呷醋？）報定案啦！（唔叫埋佢？）唔係人人都可以咁早起身。」