陳凱琳細仔出世 晒全家福報喜

鄭嘉穎與陳凱琳都係一副有子萬事足模樣。

鄭嘉穎與陳凱琳（Grace）於2018年拉埋天窗，去年榮升父母，誕下大仔鄭承悅（Rafael），並於今年5月公布懷有第二胎。原來二仔已靜悄悄出世，昨日Grace在社交網報喜，上載一張一家四口的全家福，畫面相當溫馨。Grace發文透露二仔的洋名為Yannick，並指他雖然比起預期早了出世，但慶幸母子平安，又分享升格做哥哥的大仔與弟弟相處融洽，希望他們能互相扶持，一同成長。而第二度做爸爸的鄭嘉穎則冧爆抱住囝囝狂錫，又留言：「細佬來了，母子平安，非常感恩。」

• Yannick鼻高面尖，似足陳凱琳。

哥哥幫手照顧BB

Grace接受訪問時說：「BB係喺上個禮拜一7月27日出世，我同BB已經安全返嚟屋企，大家相處都好融洽，Rafa做咗哥哥好乖好幫手，幫我哋睇吓BB，大家都非常之安慰嘅！」她續指今次佗B因有了第一胎的經驗，做足心理準備，故整個懷孕至分娩的過程都非常順利，充滿喜悅，她又透露：「嚟緊會多啲休息，希望大家都安安全全留喺屋企，盡量唔好出街啦，自己坐月都喺屋企養番好個身體，多謝大家關心！」

而鄭嘉穎受訪時則表示二仔已取中文名「鄭承亮」，他說：「好開心，母子平安，依家冇乜嘢緊要過身體健康。二仔似老婆，鼻高高、面尖尖，似老婆好呀！最緊要佢身體健康，開開心心咁成長，已經心滿意足。」