藝人梁思浩日前主持網台節目時堅拒戴口罩，昨日傳出網台高層為此事和他吵大鑊，更揚言要換走他！
思浩受訪時表示：「我已經用私己錢，去租一個私人又消晒毒嘅錄音室成個月，目的係保障自己同兩位拍檔李麗蕊同陳彥行嘅安全，只係我要用鼻抖氣，戴口罩要拉落少少啫，我咁做法都唔合佢要求就冇法。（網台總經理蔡浩樑話聽（今）日就換走你。）其實係我講先，自己畀錢搵人代我至9月4日為止，網台同蔡生唔係我僱主，佢哋冇資格炒我，我哋只係合作形式，我每個月畀20萬佢嘅。（唔做覺得可惜？）廣播界我做咗20幾年，依家手頭上有兩個電視台節目要做，唔做網台可以抖吓係福氣，我係怕兩個拍檔冇咗份工。」