麥德羅疑遭同房感染病情好變壞

歌手麥德羅本月17日確診新冠肺炎，入住威爾斯醫院，經連日來打針及服藥後，身體逐漸康復，不過昨日傳來病情變差，要坐白車轉往上水北區醫院的消息，他受訪時稱：「我住嗰間4人房，呢幾日隔籬多咗個86歲嘅確診伯伯，佢成日唔戴口罩喺度咳，可能又感染到我。最初入院時，醫生話我指數得23分，慢慢好到30分，諗住打完第5支針後，就快出院啦，點知又咳番，跌到26分，我咪要求轉房，想同啲年輕病友住囉。」

劉少君有望出院

他自爆曾在病房中除口罩做運動及瞓覺，醫生表示跳繩時容易吸菌入肺，故叮囑他勿再做劇烈運動，只可拉筋。他表示可能要重新打7支針療程：「好唔抵，想喊，又要由頭儲過分，要儲夠35分先走得！」經一事長一智，他謹記任何時間都會戴口罩。

跟麥德羅有親密接觸而確診、昨日留院第9日的劉少君，大有機會下周出院，他說：「聽（今）日係大考，抽血化驗係咪Pass，仲要連續兩日篤鼻（深喉唾液測試），如果正常就走得。」至於同為麥德羅親密接觸而確診的女友劉麗萍及歌手施匡翹仍留院中，進度良好。

另外，等足4日才於前晚坐白車入聯合醫院的鄧達智，入住負壓病房，他表示：「抽血、檢驗，搞到凌晨2點半，朝早有啲攰，其他OK。」問到為何不着病人衫？他說：「因為唔係黑色。（護士批准？）邊度理得我咁多！」又指同房的中年病友認得他。