陳家樂被嫌拮肉向湯怡耍冧
「男神」陳家樂挑戰為繽FUN星網王牌節目「繽FUN主播室」擔任主播，未埋位前「打定底」自嘲唔合格，結果當然真人不露相，全程幾乎零NG，絕對是「家樂一出手，就知有沒有」！連主播嘉琪都表示被他欺騙，他即一臉不好意思：「我之前咪話有人踩我唔掂嘅，呢個人就係我老竇！佢成日話我講嘢一舊舊，咁我當然唔及森美、陸永，但今次為繽FUN星網做主播，起碼畀我老竇睇到我都冇失禮，挑戰成功。」
家樂是公認勤力的藝人，認真把握每個演出機會，正如他最近擔正電影《死因無可疑》，足足用了一年時間去準備，更試過忙到幾日幾夜沒有返過屋企，竟遭女主角湯怡投訴，他尷尬說：「講起真係對唔住湯怡，有排太忙……情緒又起伏，連儀容都唔顧！咁啱要同佢拍親熱戲，搞到佢好唔舒服，畀我啲鬍鬚拮到佢好痛。」他坦言最希望可以擺脫靚仔樣，拍多些內心戲，正如今次戲中被利用設局陷害，對他來說是拍戲以來最嚴峻的考驗。
