張筠挑機影后唔Mind獻醜搞笑
70年代當家花旦文雪兒的大女張筠（Christy）正式加入娛樂圈，Christy畢業於倫敦大學學院土木工程系碩士課程，現職土木工程師，被指貌似韓劇《夫妻的世界》中「最強小三」韓素希。她直言自小已有不少人叫她參選港姐，但她一心想做工程師，現時心願達成，希望挑戰另一領域：「我想更自信面對鏡頭，同埋認識更多範疇嘅嘢，所以值得去嘗試。」
自爆冇仔追
Christy外表柔弱，想不到是運動健將，曾代表香港出戰閃避球賽，她說：「好多嘢都係機緣巧合促成，我個性比較強，唔服輸。（有冇失敗過？）都失敗過好多次，細個喺香港讀書成績唔好，靠自己好辛苦好努力，慢慢做到工程師。」由於工作關係，圍繞她的以男性為主，問有否追求者，她說：「冇，亦冇拍拖，可能我性格比較男仔頭。（想唔想拍拖？）過時過節都會想。」
入行拍戲，Christy反而想做諧星，又立下目標，想有影后章子怡的成就：「我鍾意喜劇，醜女都冇所謂，好似《少林足球》嘅趙薇，我覺得好正。（以邊個為目標？）我會向住最遠嘅目標，想好似章子怡衝出國際，我如果真係去做，就希望做到最好！」另外她亦想做打女：「我屋企係功夫背景，好後悔細個冇畀心機去學，依家希望搵三姨媽元秋叫佢過幾招。」
想邁向國際
她又表示很佩服媽咪文雪兒：「佢係好特別嘅人，個樣比較柔弱，其實韌力好高，經歷唔少苦。」而談到不少星二代入行，Christy對苗僑偉女兒苗彤形象最深刻，更希望與對方一樣不靠父母的名聲打響名堂，她說：「我有機會都想似佢咁衝向國際，覺得佢好叻，唔想靠爹哋，去加拿大靠自己嘅努力有一番作為。」