特訓兩周崔碧珈奔月送外賣

女星崔碧珈昨日以「未來戰士」造型現身,偕崔媽媽及姨甥女齊齊拍攝月餅廣告搵真銀。她笑言今次總動員收取「開心價」酬勞,並大讚近兩歲的姨甥女表現好:「廣告入面佢做肥嫦娥,我就係地球速遞員,速遞月餅上月球畀佢。拍之前同佢練咗啲動作兩個星期,驚佢唔適應,點知拍一次就搞掂,可能佢之後啲工作仲多過我。(做佢經理人?)咁要問番佢媽媽啦!」又笑言拍到後期她和小朋友都躁底:「佢戴嗰個頭飾好重,加上熱,拍到佢都忟,佢平時唔會發脾氣。」

講到舊愛吳浩康早前反擊她,表示被指「大話精」及「扮上進」是誣衊,她多次表明最近少看娛樂新聞:「冇乜回應啦,件事過咗咁耐,近期關心疫情新聞多啲。(唔再在乎對方講啲咩?)如果係朋友會關懷,但唔會刻意。」