特訓兩周崔碧珈奔月送外賣

女星崔碧珈昨日以「未來戰士」造型現身，偕崔媽媽及姨甥女齊齊拍攝月餅廣告搵真銀。她笑言今次總動員收取「開心價」酬勞，並大讚近兩歲的姨甥女表現好：「廣告入面佢做肥嫦娥，我就係地球速遞員，速遞月餅上月球畀佢。拍之前同佢練咗啲動作兩個星期，驚佢唔適應，點知拍一次就搞掂，可能佢之後啲工作仲多過我。（做佢經理人？）咁要問番佢媽媽啦！」又笑言拍到後期她和小朋友都躁底：「佢戴嗰個頭飾好重，加上熱，拍到佢都忟，佢平時唔會發脾氣。」