李思欣捱過淡市 有客問價

藝人范振鋒、李思欣及蘇慧恩，昨午到尖沙咀出席慈善活動。阿范夫婦疫情後工作量大減，最近才有客戶接觸洽談合作，思欣說：「起碼多咗人問工作價，有單11月做司儀落實咗，但未知會唔會延期。」阿范則透露自己加入的娛樂公司將開拍賀歲片，由佘詩曼做女主角，預計8月開鏡：「但依家（疫情）未知情況點，如果搞到10月先開，驚趕唔切後期製作。（多咗時間相處，積極造人？）多咗時間，自己好好做人就真。我依家返電台開咪都要注重打扮，事關多咗開Live出鏡，所有嘢都轉型。」又預告計劃疫情後夫婦出埠拍旅遊節目。