Kylie疑誇大業績 被踢出富豪榜

美國真人騷家族Kardashian的22歲成員Kylie Jenner,被財經雜誌《福布斯》(Forbes)指控造假,誇大自家品牌業績,被褫奪「最年輕白手興家10億美元富豪」稱號,她嬲爆反擊,指雜誌謊話連篇!

冧莊《福布斯》「最年輕白手興家10億美元富豪」的Kylie,被《福布斯》指控與母親Kris Jenner造假,誇大Kylie創立的化妝品品牌Kylie Cosmetics的業績,將Kylie踢出富豪榜。雜誌指兩母女曾提供2016年至2018年的年度營業額,約23億9,460萬港元至28億800萬港元,但其實2017年只賺約13億8,060萬港元,2018年則賺約9億7,500萬港元。Kylie的會計師亦涉嫌製造虛假報稅表,令雜誌錯判Kylie的資產。Kylie身家被重新估算為約70億2,000萬港元,差一點才能打入富豪榜。

睇完得啖笑

Kylie知道自己被Out出富豪榜後,嬲豬反擊:「我起身睇到乜?我仲以為佢哋係有信譽!只係見到一堆唔真確嘅說法同冇證據嘅假設,笑死我。我從來冇想過要咩銜頭,或者嘗試講大話去得到。話我好可能假造報稅表?咁就係證據?即係你哋只係覺得佢哋係假,我睇緊乜嘢?」

律師要求撤回文章

但之後她表示不介意:「咁好啦,我已經好幸福,有個美麗嘅囡囡,成功嘅企業,我亦非常掂。我依家可以列出100件更重要嘅事,而唔係去爭拗我有幾多身家。」其律師亦發出聲明,反擊《福布斯》謊話連篇,要求雜誌立即撤回文章。