郭奕芯被評廚藝即鬆㬹

眾人昨日現身西營盤「決戰」，即場分成兩組經營餐廳對決，郭奕芯、楊天宇（Angus）及陳欣妍同隊，受訪時問到三人廚藝如何？陳欣妍冧指有為男友沈震軒下廚，但笑說男友唔夠膽批評。Angus自言廚藝不佳，故只被分配做切菜、洗菜等「重任」。為勝出賽事，陳欣妍諗盡計仔，自爆取勝絕招：「諗住係靠Angus嘅英俊外表、健碩身材吸客。」對方聞言搞笑表示不介意騷肌：「唔會一嘢拒絕！」

講到上季參賽者以性感造型煮食，Angus失望踢爆今季冇睇頭：「佢哋套廚師褸封到上頸，冇得救o架啦！哈哈！唔係嘅，今季唔再賣弄性感，希望觀眾睇廚藝。（想要個識煮嘢嘅女友？）最好！呢個係技能，但唔係話唔識會扣分。（兩位隊友邊個煮得好食啲？）未試食過佢哋煮同一個菜。」當問到煮食時邊個廚房較亂？郭奕芯即批㬹Angus，無意中自爆！

另外，緋聞情侶黃奕晨（Dixon）及譚凱倫（Helen）首度公開孖住亮相，大方合照及受訪，Dixon否認傳緋聞後首次合作：「之前有節目合作過，見面唔會好尷尬。」又抵死笑指Helen是男人：「除非我轉『基』啦！」

黃奕晨「嫌棄」譚凱倫

問到Dixon現時的感情生活？他無奈笑說：「非常之Dry！託賴呢段時間有嘢做，所以根本冇時間諗拍拖。」更反問記者是否有對象介紹？記者即推薦Helen，他就繼續派「好人卡」：「我哋性格只做到朋友，我係外貌協會。」Helen亦責怪因緋聞令追求者數字急跌。