龐景峰飛上海 酒店隔離大把嘢做
藝人龐景峰早前出發到上海為網絡電影作準備，開工前先進行14天隔離，他經過身體檢驗及防疫措施後，由專車直接送往指定酒店，他表示酒店是冇得揀，下車才知道住哪間：「入房第一時間先消毒清潔，三餐由酒店安排，放喺酒店房門外椅上自取，自己會將垃圾袋打結放喺房門外，同埋每日兩次量體溫匯報健康情況，我自備洗衣粉自己洗衫，其實每次出差開工我都會自己洗衫。」
性格好動的景峰，在酒店房的14天如何度過？他說：「我每日必會做運動Keep Fit，好彩酒店房間有空間畀我做伸展運動，每個運動姿勢我都寫上名稱，影畀大家睇，等大家可以喺屋企跟住做！」他表示趁隔離期間，除了練戲及背熟對白外，還畫畫自娛，原來他亦有文靜的一面：「我每日都畫一幅畫，這幾天已畫了幾個漫畫同卡通人物 ，好似中華英雄、Sailor Moon！」貪玩的他還會挑戰自己，笑言14天內不剃鬚，要看自己的留鬚Look。