于淼搣甩柔弱練武撻生魚
藝人于淼（Maggie）近年劇接劇，發展相當不俗，外表嬌柔的她實則獨立、剛強，去年更開始跟金牌特技人何珮珉（Mandy）學武，向打女目標邁進，期望成為「多功能」演員，睇得又打得！Maggie上堂時有板有眼，只需Mandy簡單提示就做出多個動作，更出力將對方撻落地。Maggie學武近一年，直言曾因太用力而拉傷大腿筋，但仍堅持學武，絕不半途而廢。
試鏡哭訴來港辛酸
于淼於2012年從北京來港發展，坦言起初因不諳廣東話而大為苦惱，獨自面對生活，加上無形的工作壓力，令她一度崩潰：「記得嚟香港冇耐，有次試鏡，當時可能有好多委屈，咁啱試鏡題目係嚟香港嘅感受，唔知點解，我邊講邊喊得好厲害。（當時你講咗乜嘢？）大約係話自己喺香港冇人冇物，但都要生存落去，當時啲工作人員以為我畀人蝦得好犀利，係咁安慰我，依家諗番轉頭覺得幾好笑。」
